So bün ik to Plattdüütsch kommen !

Op Platt vertellt
Plattdüütsch bi "Tante Tietjen"
Siet Dez. 2004 bünn ik nu aal bi de Plattschrievers mit dorbi un dat
mookt mi jümmer mehr Spooß .
Dorbi hebb ik Platt nich in`n Huus liernt -leider mütt ik seggen.
Mien Oma un ook mien Öllern kunnen aal perfekt Platt , over
domols hett`n dat Platt nich so wichtig nohmen.
De Kinner schullen eerstmol richtig Hochdüütsch lernen,saen ook
de Schoolmeestern.
Dat Kinner ook twee oder dree Sproken to glieke Tied liernen könt,
dat weet wi hüüt, over dat wöör domols anners.
To `Glück harr ik uns Noborsch, Tante Tietjen, de hett
mi Platt liernt.De wöör nich mit uns verwandt, wi Kinnern saen jo
to al de Froonslüüd in Dörp " Tante " un to de Mannslüüd " Onkel ".
Tante Tietjen de wohn in dat lütt Huus blangen uns un de harr
jümmers för mi Tied. Se seet jümmers in ehr Köök un wöör
an Kartüffel schellen, Eten koken oder Arven puhlen.
Ik kann mi nich besinnen, dat se mol nich in de Köök wöör
oder dat se mol nich för mi Tiet harr oder se mi wedder nu
Huus schickt harr.

Un Tietjens harrn noch dree Soken, de interessant wöörn för
mi de wi nich harrn in`n Huus:Katten, een Plumpsklo un een
Fiernseher.
Katten much ik as Kind to giern, over mien Öllern saen jümmers,
wi wohnen to dicht an de Stroot un dort harr dat mit Katten
keenen Sinn.Dor harrn se seker Recht un so güng ik jümmers
mit Tietjens jemehren Katten speelen.
Dat Plumpsklo in dat holten Huus op `n Hof wöör spannend:
Ik harr denn jümmers Zeitungen to`n Lesen un achteran to`n Afwischen
un so wöör dat dor nie langwielig.
Un eenen Fiernseher harrn wi in `n Huus nich, mien Öllern wullen nich,
dat wi soveel kieken schullen, over eenmol in de Week dröffen wi
ook to de Noborsch to`n Kieken, wenn "Pipi Langstrump" kööm
oder sowat.
So seet ik denn meisttieds mit Tante Tietjen in de Köök un wi vertellen
uns wat - se op Platt un ik op Hochdüütsch, over verstohn hebbt wi uns
jümmers bannig goot.
Blots eenmol harr ik in ehren Gorden Kirschen klaut un se hett mi
tofoot kregen.Ik weet vundog noch, wo ik mi schomen dae un denn
bünn ik een Tiedlang nich hengohn.Over as mi denn entschülligt
har, wöör ook wedder allens in de Reeg.
Ohn Tante Tietjen wöör ik wundag nich Platt schrieven oder Snacken,
ik kann mi overnich mehr bi ehr bedanken, se is aal lang doot.
Loter hebbt wi denn ook foken Radio Bremen op Platt höört.
Denn wi harrn jo jümmers noch keen Fiernsehen.
Plattdüütsche Hörspeele oder ook mol plattdüütsch Theater.
So kummt dat, dat ik dat jümmers aal verstohn kunn, over
snackt hebbt wi dat nich.
So as mi dat gohn is, kunn dat ook annere gohn - veer Millionen
Lüüd verstoht in Neddersassen noch Platt, so lang as se dat noch
verstoht, is de Sprook ook noch nich doot.
Ik freih mi jümmers, wenn mi een vertellt, dat he oder se mien
Geschicht in de Zeitung leest hett un ik wunner mi foken, woveel
Lüüd hüüt noch Platt verstoht un snacken könnt.

Loot uns man glieks dormit anfangen !!


Zurück